1Jo 1 | TPZ | STEP | Emöm to vatvus vamaaka rakah em pa Soe vëh, to teß me non o toßtoß, a Soe pamëh to teß moaan rakah voh e non. Ka Soe pamëh to teß maaka rakah voh e non. Emöm to tënan voh em peß, ko ep em peß, pamöm pök em peß pa ma korenmöm. Pamöm kiun ke nös peöm pa soe va pa Soe pamëh.

1 John 1

A Soe To Teß Me Non O Toßtoß To Tavus Vamaaka En

1 Emöm to vatvus vamaaka rakah em pa Soe vëh, to teß me non o toßtoß, a Soe pamëh to teß moaan rakah voh e non. Ka Soe pamëh to teß maaka rakah voh e non. Emöm to tënan voh em peß, ko ep em peß, pamöm pök em peß pa ma korenmöm. Pamöm kiun ke nös peöm pa soe va pa Soe pamëh. 2 Ka teß vaßih to heßheß a rora sih o toßtoß tamoaan to tavus vateeraß en, kemöm ep voh em peß pa ma matanmöm, pamöm vavatvus nem sih a soe va peß. Emöm to soe vamaaka rakah kem peöm po Toßtoß Tamoaan pamëh. Moaan voh no Toßtoß pamëh to teß vaßpeh me voh e non pe Tamaara, ka kuru vaßih, neß to tavus vateeraß rakah en, kemöm ep em peß. 3 Emöm to soe tavus rakah kem peöm pataeah nemöm to ep in pamöm pënton. Suk ataeah, emöm to iu me nem a ö ne eöm se vapöh kokoman me a möm, ka vapöh kokoman me e Tamaara, ke Sunaißeah Ieesuß Kristo. 4 Emöm to kiun ka nös neöm o kiun vaßih, pan eöm se ep paröm vaeö vaßpeh me a möm.

E Sosoenën To Ihan Anoe A Ma Hat Pea

5 Ke eß ivaßih, a soe nemöm to pënton voh, ne Ieesuß Kristo to vavatvus voh non, nemöm to vatvus pet ka no nös neöm. E Sosoenën koman, eß o maaka, ka manih peß no a hikta pah ö popoen to teß non. 6 Ivëh, ka se keh soe ee pan, ea to vapöh kokoman me no pe Sosoenën, ivëhkëk, ea to teß avoeß e no pa nok a ma taateß va pa popoen, ea to pikpiuk e no, para hikta vavatet no a taateß man. 7 Ivëhkëk, ea se keh teß no po maaka vamanih pa ö ne Sosoenën to teß va non, ea to onöt e no pa vapöh kokoman me ro upöm teß. Ko eraß pe Koaß pe Sosoenën vëh e Ieesuß Kristo se pupui vahik en pa ma hat pea.

8 Ea se keh soe pan, ea to hikta teß me no ta hat, a, ea to pikpiuk koman hah a no, ka soe man hikta teß non manih pa komaara. 9 Ivëhkëk, ea se keh soe vatvus a ma taateß hat pea manih pe Sosoenën, e Sosoenën se ihan anoe en pa ma hat pea, suk ea to ta e no peß se nok en pa taateß vih totoopin. Suk ataeah, eß se pupui vahik en pa ma hat pea manih po eraß pe Ieesuß Kristo. 10 Ea se keh soe pan, “Ea to hikta teß me no ta hat”, a, ea to sosoe va e no manih pan, e Sosoenën eß a teß pikpiuk. Ivëh, no a soe peß to hikta teß suk non manih pa komaara, ka hikta iu kon no o vavaasis peß.